Li Hewlêrê ji bo bergiriya Covid-19ê çend tevdîrên din hatin wergirtin

PeyamaKurd - Bo rêgiriya li belavbûna vîrusa koronayê (Covid-19) û xweparastina li vîrusê parêzgeha Hewlêrê çend biryarên nû hatin derxistin.

Îro Şemiyê (07.03.2020) beşa ragihandina parêzgeha Hewlêrê li ser hesabê xwe yê fermî yê facebookê de daxuyaniyek belav kir û amaje bi wê yekê kir ku ji ber berjewendiya giştî û bo xwe parastina ji Covid-19ê û parastina jiyana hemwelatiyan li ser fermana parêzgerê Hewlêrê çend biryarên nû hatin derxistin.

Ew biryar wiha ne:

• Ji 8ê Adarê heya 1ê Nîsanê dê hemû kuaforên jinan, navnedan ciwankariyê û cihên vexwarina alkole bêne girtin.
• Cihên lîstikên zarokan li hemû qadan, bexçeyan giştî û firoşgeh heya 1ê Nîsanê dê werin daxistin.
• Li gor rewşê ger pêwîst bike dem dê bê dirêj kirin.

Wezareta Tendirustiyê ya Herêma Kurdistanê di daxuyaniyekê de ragihandibû ku testa Koronayê bo 27 kesan hatiye kirin û di encamê de testa jinekê pozîtiv derketiye. Li gor  wê daxuyaniya Wezareta Tendirustiyê, ew jina ku bi vîrusa Koronayê (Covid-19) ketiye, temenê wê 33 sal e û ji Hewlêrê ye.

Cîgirê Serokê Herêma Kurdistanê  Şêx Cafer di çarçoveya tevdîran de ragihandibû ji ber rêgirtina li belavbûna vîrusa Korona (Covid-19), tevahiya rahênankirina Pêşmerge hatine rawestandin.